Pinulongan Binisaya

ari natu eshare sa atung mga higala ang mga nagkadaiyang mga Hubad binisaya...pwede dinhi ang mga tigmo tigmo ug mga balak-balak...o kinsa man ang mo-una?..

Nahala.. ako lang sa'y una....kini nag-uluhan na

Kinilaw


Isdang dimalason, bulahan ikaw!
Unsaon ta man, nabihag ka sa laang
Sa ginansilyong nylon nga pukot
Nga gitaktak sa nangadlawong mangingisda.

Isdang bulahan, ikaw gidimalas!
Nagkisikisi, naghiyud-hiyod ka'ng
Gipareglahan, ug dayag nga gihuboan
Sa sinina mo'ng pilak.

Isdang palaran, isdang nagtinga,
Bisan ang gahum sa Magbubuhat
Wala mopugong sa lantip nga kutsilyong
Mitagud-tagod, mihiwa sa imong lawas.

Isdang alaut, hinungdan sa among pagmaya--
Ganina lang gatadlas-tadlas ka sa kaparatan.
Apan dimalas sa tanang dimalas,
Naglangoy ka na sa suka.

Isdang pinili, isdang napukan,
Ang imong dimalas nakabusdik sa among tiyan,
Gi-antus, gikilaw mo ang kasakit,
Ug ikaw among gikilaw.

Bulahan ka gayud, isdang kinilaw,
Kaysa kanamong mopiyait sa among pagkabihag,
Kanamong kasagaran maanod sa parat nga luhang
Dala sa aslom nga kaagi,
Kanamong tinagud-tagod, hiniwa
Ang diwa ug pagbati.

Sugbo, Kumusta Ka?

Sugbo, sukad niadtong una ka'ng nakaplagan
Sa Portuges ug banyaga nga si Magellan,
Ang paglambo ug pagtubo mo dili mapugngan
Sama sa baha nga dala sa ulan.

Gikan sa paganong pagsimba sa mga anito
Nadani ikaw sa batobalani ni Santo Niño,
Ug ang sayaw mo'ng abante kaduha, atras kausa,
Nahimong balaang pangaliya alang Kaniya.

Ug ang kanhiay sayaw sa pangaliyupo
Sa materyalismo sa bag-ong panahon namûmû.
Inay sayaw sa pagdayeg ug pangaliyaba,
Nahimong sayaw sa tag-dos nga kandila.

Puslan ma'ng naghisgot ta'g komersiyo,
Mangadto kita sa ilang sentro--
Kanhiay Carbon, Pasil ug Taboan man.
Apan karon sa Country Mall, Ayala ug SM gihulipan.

Wala'y ikatandi ang duha ka higante
Sa alimyon sa buwad, ginamos, danggit ug tangige
Nga nangamay diha sa Taboan, daplin sa kalye,
Matag higayon nga kita moagi.

Samtang nagkamahal ang mga palaliton
Misanay sab ang mga dagkong tindahan
Ang Gaisano Metro, pinakasayong tultulon
Yamats, nagkahabog, nagkataas na man.

Kaniadto sa Gaw ta mangita og tsinelas,
Sapatos, sinina, kape ug gatas.
Apan karon ang Gaw dili na nimo matultol
Tungod kay gipulihan sa mas dako nga Colonnade Mall.

Ang dalan Colon mismo ayaw sab kalimti,
Diin kanhiay tartanilla ang naghari.
Karon nagsardinas na ang mga jeepney
Ug ginadili ang pataka'g pangluwa ug pangihi.

Kaniadto mahimo ka'ng molabang bisan asa--
Apan karon, sige padayon, multahan ka.
Mga CITOM kada eskina nag-atang,
Pitohan ang mga malapason ug magpatakâ'g labang.

Naggilak-gilak ang nagkadaiyang kolor sa Colon.
Ang cellphones mahimong kalit lang labnihon.
Hapit tanang Sugbuanon sa cellphones nanag-iya--
Bahala'g dili makatawag basta ang text lang anaa.

Ang pinakalab-as nga salida imo na'ng nakita?
Kung wala, adunay barato nga mga VCD ginabaligya.
Sa kilid-kilid sa dalan Colon, naa'y daghan diha,
Kauban sa mga Buddha beads, kwintas ug Tamiya nga panglumbà.

Sugbo, makagutom ang paglaag-laag sa imong kadalanan,
Apan mga matimôtimô sa may Manila Bank adunay daghan.
Manggang hilaw, mani'ng tam-is ug parat
Ice water, ice candy--makatagbaw bisan sa barat.

O kung medyo puno ang imong pitaka
Ang Jollibee ug McDonald's, hala duawa.
Pagkaon sab sa Goldilocks, labihang lamia,
Basta ang putos ilabay lang sa trash can ha? Basin dakpon ka.

Ang mga batan-on mo, Sugbo, kumusta na?
Nagkabuang sa internet, Dance Revo ug Tamiya,
Counterstrike, Broodwars, Star Craft ug uban pa-
Ambot lang wala ba kaha mangabsent kining mga bataa.

Bisan asa ka paingon, ang sakyan mo jeepney.
Pastilan kabarato sa kanhiay pliti
Apan salamat sa huyang nga ekonomiya
Ang plete tag-tres pesos na.

Apan nganong magpaluto ka man sa init
Nga mahimo mang sa bugnaw ka magkurog--
Sulod sa V-hire nga mohatod nimo sa dapit
Diin ikaw nagpuyo ug mokanaug.

Ang mga agianan sab nga gitawag nato'g dalan
Gi-ayo, gitapakan, gipadak-an ug gipalapdan
Tungod kay sayod ang City Hall nga mga sakyanang nagdagan
Hapit na moapas ang gidaghanon sa mga molupyo ni'ng dakbayan.

Buot ipasabot, sayon na lang ang pag-adto sa Larsian,
Ang labing inila sa tanang barbekyuhanan,
Paboritong kan-anan sa daghang katawhan,
Nga nagtrabaho o nagsuroy-suroy, mahapunan o mabuntagan.

Kung buot ka'ng moadto sa Mactan
Ari na lang agi sa ikaduhang tulay
Kay mas lapad tinuod ang agianan
Naa pa'y parke sa ilawom diin mahimong magpaharuhay.

Apan pagmatngon lang, kung dili ka adunahan,
Nga jeepney o pribadong awto imong sakyan.
Tungod kay baynte singko pesos na ang flagdown sa taxi
Ug dos pesos ang matag patak niini.

Ay Sugbo! Tinuod gayud nga nausab ang imong dagway.
Ambot lang kaha kung matawag ba'g kahayahay,
Kay daghan gihapon nimong mga anak ang gihikawan sa kahamugaway,
Ug ang ordinaryong mamumuo, nagsingot lang gihapon, nagtulò ang laway.

Maayo pa'ng manganta na lang ta sa tagsa-tagsa ka panimalay,
Kondili, sa videoke nga hulogan og tag-singko ra, Bay.
Ingon niini ka-simple ang kinabuhing Sugbuanon--
Usahay pait, usahay tam-is, apan kanunay'ng malipayon ug malamboon.

Ug Sugbo, nakaplagan ka dili lamang ni Magellan
Kondili lakip na sa teknolohiya ug kabag-ohan.
Busa, pila ka tuig gikan niining adlawa
Paabota ang akong sunod nga pangumusta.

ahak balak2x diay ni? buhat sa ko balak

waaaaaaaaaa

na halaaaaaaa!!!!!!!!!!!! GINHAWA delfin

Ani-ay bag-o nga akong nalangkat gumikan sa moderno nga kasangkapan ang internet. Maghina-ot ko nga malingaw mo aning akong sugyot. Kini ang sulat ni Emong ngadto sa iyang higala

Kompyuter Ilitireyt

Bay,

Nauso na karon kining Internet. Miduaw ko og usa ka Internet café, Bay. Bugnaw ra ba kaayo ang sulod sa café, Bay, mora'g full blast ang aircon. Nakita nako ang labaw sa napulo ka kompyuter. Usa ra ang bakante ug mao kadto ang akong gigamit.

Pastilan, lingawa nako, Bay. Nakat-on ko'g chat sa mga wala hiilhing mga tawo dinhi sa Sugbo ug sa nagkalain-laing dapit sa kalibutan. Duna'y mi-estorya nako, Bay, nangutana siya, "CTC?" Pastilan, Bay, ihalas man ko aning chat. Abi nako'g cover to cover ang kahulugan sa CTC, diay to, care to chat diay. Busa, mitubag ko og, "Sure!" Pastilan, Bay, nangutana na man pud siya, "ASL?" Nagnganga na lang gud ko atubangan sa monitor, Bay. Na-unsa man ni, puro man ni shortcut ang extoryahanay sa chat! Pwerte niyang katawaa, Bay, nga ako siyang giingnan kung kahulugan sa ASL, ambot sa langaw ba. Gipasabot ko niya nga ang ASL nagkahulugan sa age, sex, and location. Mao kini ang sarang ipangutana sa imong bag-ong maka-chat.

Daghan mi'g naabot sa among estoryahanay, Bay uy. Pastilan, puro lagi shortcut. Pananglit, ang "you are" mahimo na lang "u r". Dayon, ang "I see" mahimo na lang "i c". Tinapolan man gyud ni, Bay. Pastilan.

Pastilan, Bay, miingon akong ka-chat nga mangihi kuno siya. Mi-type siya og "BRB". Pagkaluag na sa iyang pantog, nangutana ko'g unsa'y pasabot sa BRB. Be right back diay ang pasabot, Bay. Nahimuot gyud siya nako, Bay, kay ni-type man siya og "LOL", pasabot laughs out loud. Usahay pud, mo-type pud siya og "ROFL", pasabot rolling on the floor laughing.

Pastilan, Bay, ang mga lihok sa imong ka-chat imo na lang basahon sa screen tungod kay tua man sila sa layong dapit. Naglisud ko'g imagine kung unsa'y dagway sa akong ka-chat, Bay. Pastilan baya, Bay no? Basin gwapa to siya, o libat, o baho og baba, o gahubo ra...wala ko masayod. Screen ra akong gi-atubang, Bay.

Akong gipahibalo ang akong ka-chat bahin niining kalisud. Busa, mipadala siya og letrato. Pastilan, Bay, dalia rang miabot! Wala ra'y 30 segundos, nakita na nako ang iyang hulagway sa monitor sa computer. Bati man diay og nawong, Bay. Pastilan! Busa, miingon na lang ko'g, "GTG", pasabot got to go. Adto na ko. Ingon siya nga magpadala na lang siya og e-mail nako. Nitando ra pud ko.

Tuod man, Bay, pag-abli nako sa akong mailbox mga pipila ka minuto ang milabay, tua na sa sulod nag-atang ang iyang suwat. Pastilan no, kung iya pa tong gipadala sa koreo, tingali sunod buwan pa nako madawat ang iyang sulat.

Wala ra nako bawsi ang iyang sulat, Bay, kay basin ma-develop unya siya nako. Gwapa ra ba unta siya, pero may depekto lang sa iyang nawong. LOL

Ang imong higala,

Emong